'दरबार हत्याकाण्डपछि लगातार छिमेकीको हस्तक्षेप'

भिडियो हेर्न बक्मा क्लिक गर्नुहोस!

काठमाडौं, माघ ६ - नेकपा-माओवादीले २०५८ मा दरबार हत्याकाण्डपछि दलका शीर्ष नेतृत्व हच्केका कारण मुलुकको राजनीति 'परनिर्भर' हुँदै गएको निष्कर्ष निकालेको छ ।
खासगरी एमाओवादी अध्यक्ष पुष्पकमल दाहाल र नेता बाबुराम भट्टराईले उक्त घटनापछि तत्कालीन पार्टी लाइन नै फेरेको उसले खुलासा गरेको छ ।

'दरबार हत्याकाण्डले नेताहरूलाई नराम्ररी गलायो,' आइतबार बुद्धनगरस्थित पार्टी कार्यालयमा कान्तिपुरसँग माओवादी सचिव देव गुरुङले छिमेकीको हस्तक्षेप पनि उक्त घटनापछि नै बढेको जनाए ।
पूर्वराजा वीरेन्द्रको हत्यापछि नेताहरू डराएको र त्यसपछि बाह्य शक्तिकै इसारामा काम हुन थालेको उनले दाबी गरे । तत्कालीन अवस्थामा एकै पार्टीमा हुँदा माओवादीका शीर्ष नेताहरूले बाह्य शक्तिकै इसाराले पार्टी लाइन प्रभावित भएको र त्यो अहिलेसम्म पनि कायम रहेको पार्टीको निष्कर्ष रहेको उनले बताए ।

राष्ट्रवादी शक्ति कमजोर बन्दै गएकाले 'राष्ट्रिय स्वाधीनता'को आन्दोलनलाई मुख्य रूपमा उठाउनुपर्ने बहुमतको दस्तावेजलाई नेताहरूले निष्त्रिmय पारेको उनले स्मरण गरे ।
रोल्पाको फुन्टिवाङ बैठकमै स्वाधीनतालाई मुख्य मुद्दाका रूपमा पार्टीले लैजानुपर्ने भन्ने बहुमतको धारणा कार्यान्वयन नभएको उल्लेख गर्दै भने, 'त्यतिबेलैदेखि प्रचण्ड र बाबुरामले स्वाधीनताको मुद्दालाई थाती राखे । र, लोकतान्त्रिक गणतन्त्रमा मात्र अघि बढे । त्यसको पछि पनि दरबार हत्याकाण्डपछिको मनोविज्ञानले काम गरेको छ ।'
पार्टीको फेरिएको लाइन, स्वाधीनताको प्रश्न र नेताहरूको कार्यशैलीमै प्रश्न उठाएर डेढ वर्षअघि माओवादी विभाजन भएको थियो । नेताहरू आत्मकेन्दि्रत र व्यक्तिवादी हुने क्रम नरोकिए एमाओवादी फेरि फुट्ने उल्लेख गर्दै भने, 'एमाओवादीभित्र व्यक्तिवादी प्रवृत्ति छ । पद र पैसाका लागि जे पनि गर्न थालिएको छ । मैले जे गरें त्यही माक्र्सवाद र माओवाद भन्ने प्रवृत्ति झाँगिएको छ,' यही समस्याले डेढ वर्षअघि पार्टी विभाजन भएको जनाउँदै गुरुङले भने, 'गलत प्रवृत्ति पुनरावलोकन भएन भने एमाओवादीभित्र पनि प्रचण्ड र बाबुराम दुईतिर हुनेछन् ।'
एमाओवादी अध्यक्ष दाहालले मंसिर ४ को संविधानसभा चुनावपछि माओवादीको कार्यदिशाको राजनीतिक विजय भएको बताएका थिए । आफ्नो पार्टीको पराजयपछि दाहालले माओवादी अध्यक्ष मोहन वैद्यलगायत नेताहरूसँग भेटेको प्रसंग राख्दै नेता गुरुङले भने, 'संविधानसभामा भाग नलिएर तपाईंहरूले जित्नुभयो । भाग लिएर हामी हार्‍यौं भन्दै उहाँ हामीसँग आउनुभएको थियो । अझै पनि सहकार्यका लागि समय बितिसकेको छैन भनेर हामीले जवाफ दियौं ।'

'दरबार हत्याकाण्डपछि लगातार छिमेकीको हस्तक्षेप'