नेपाल अमेरिकासँग ५ विकेटले पराजित

२७ कात्तिक, काठमाडौं । ट्वान्टी-२० विश्वकप छनोट अघिको अभ्यास खेलमा नेपाल अमेरिकासँग ५ विकेटले पराजित भएको छ । पहिलो अभ्यास खेलमा नेपालले यूएईलाई ५ विकेटले पराजित गरेको थियो । टस जितेर पहिले व्याटिङ गरेको नेपालले २० ओभरमा ७ विकेट गुमाएर १ सय २९ रन बनायो । नेपालका लागि उपकप्तान ज्ञानेन्द्र मल्लले ३६ रन बनाए भने सरद भेसवाकरले २६ र विनोद भण्डारीले २२ रज बनाए । यूएईविरुद्ध ८५ रन बनाएका कप्तान पारस खड्का अमेरिकाविरुद्ध भने चल्न सकेनन् । १० बलको सामना गरेका उनी व्यक्तिगत ६ रनमा एलबी डब्लू धरापमा परे । अन्तिमतिरमा व्याटिङ गर्न आएका अनिल मण्डलले ३ बलमा एक छक्कासहित ९ रन बनाए । प्रदीप ऐरी ६, सागर पुन र बसन्त रेग्मी समान ५-५ र सुवास खकुरेल ३ रनमा आउट भए । जवाफमा मैदान उत्रिएको अमेरिकाले २ बल बाँकी छँदा ५ विकेटको क्षतिमा लक्ष्य भेट्टायो । नेपालका सागर पुनले ४ ओभरमा २५ रन दिएर २ विकेट लिए । नेपालललाई सुरुवाति सफलता दिलाएका अमृत भट्टराईले १८ औं ओभरमा महंगो बलिङ गर्न पुगे । उनले ६ बलमा १६ रन दिएका थिए । नेपालले ट्वान्टी-२० विश्वकप छनोट क्रिकेटको पहिलो खेल शुक्रबार डेनमार्कसँग खेल्नेछ ।

- नेपाल अमेरिकासँग ५ विकेटले पराजित