बन्दलाई निरन्तरता दिने वैद्यको धम्की (भिडियोसहित)

२७ कात्तिक, काठमाडौं । नेकपा-माओवादी अध्यक्ष मोहन बैद्य किरणले अझै पनि समय बाँकी रहेको भन्दै सहमतिका लागि पहल गर्न सबैसँग आग्रह गर्नुभएको छ । बन्द फिर्ता लिन चौतर्फी दबाव आइरहेका बेला वैद्यले यस्तो आग्रहलाई वेवास्ता गर्दै पूर्वघोषित यातायात बन्द अझै कडा र प्रभावकारी बनाउने चेतावनी दिनुभयो । रिपोर्टर्स क्लबले वैद्यको निजी निवास धापासीमा बुधवार आयोजना गरेको विशेष साक्षात्कारमा उहाँले भन्नुभयो -राजनीतिक सहमतिविना मुलुकको समस्या समाधान हुँदैन, त्यसैले अहिले पनि केही बिगि्रएको छैन, सहमतिको प्रयास गरियोस् । म सहमतिको प्रयास गर्न नागरिक समाज, पत्रकार र राजनीतिक दलहरुलाई आग्रह गर्दछु । सरकार पनि गंभिर होस् ।’ माओवादी अध्यक्ष बैद्यले राजनीतिक सहमतिविना द्वन्द्व समाधान नहुने भन्दै बन्दुकको भरमा निर्वाचन गरे त्यसले द्वन्द्वको समाधानभन्दा पनि द्वन्द्व बढाउने बताउनुभयो । ‘शान्तिप्रक्रियाको एक अभिन्न अंग हामीलाई पाखा लगाएर शान्ति निष्कर्षमा पुग्न सक्दैन, यसले द्वन्द्व बढाउँछ ।’ अध्यक्ष बैद्यले आफूले सहमतिका लागि आब्हान गर्दा समेत सरकार र प्रमुख दलहरुले कुनै ‘रेस्पोन्स’ नगरी दमन गर्न थालिएको गुनासो गर्नुभयो । हामीलाई बेवास्ता गरियो, अब अर्को आन्दोलन गरेर फरक ढंगले अघि बढ्छौं’ उहाँले भन्नुभयो, ‘एमाओवादीलाई हामी निर्वाचनमा जाँदा हारिने र एमाले, कांग्रेसलाई दुई माओवादी मिल्छन् कि भन्ने स्वार्थले गर्दा आफुहरुलाई बाहिर पारिएको उहाँको विश्लेषण छ । आन्दोलन आफूहरुको रहर नभई बाध्यता भएको भन्दै जनतालाई आन्दोलनले केही कष्ट भए पनि यो बाध्यतालाई बुझ्न उहाँले आग्रह गर्नुभयो । आफूहरुको माग पूरा नभए जारी यातायात बन्द फिर्ता नहुने उहाँले बताउनुभयो । ‘यातायात बन्द निरन्तर चल्छ, अब बन्दलाई प्रभावकारी बनाउनतिर हामि लाग्छौं । हाम्रो माग पूरा नभएसम्म रोकिनेवाला छैनौं ।’ उहाँले भन्नुभयो । बहिस्कारका बेला फेला परेका बमहरुको विषयमा आफूहरुलाई कुनै जानकारी नभएको भन्दै उहाँले आक्रोशित जनता र कार्यकर्ताले आगो लगाउने काम गर्नु स्वभाविक भएको र यस्तो अवस्था स्वयम सरकार र प्रमुख राजनीतिक दलहरुले नै आउन बाध्य बनाएको दावी गर्नुभयो । उहाँले बाहिर हल्ला भएजस्तो सरकारले आफूहरुलाई पक्राउ गर्न खोजेको हो भने त्यसलाई सहर्ष स्वागत नै बताउनुभयो । एकीकृत नेकपा माओवादीका अध्यक्ष प्रचण्डले आफूहरुलाई मन्त्री परिषदबाट मनोनित हुने २६ सिट दिएर संविधानसभामा ल्याउने भनी दिएको अभिव्यक्तिलाई आफूहरुमाथिको अपमान भएको बताउनुभयो । जानै परे अब यो सत्ता हटाएर नयाँ सत्ता ल्याएर सरकारमा जाने उहाँले चेतावनी दिनुभयो । उहाँले प्रचण्ड प्रतिक्रियावादीको कित्तामा गएको आरोप लगाउनुभयो

बन्दलाई निरन्तरता दिने वैद्यको धम्की (भिडियोसहित