नेपाल टेलिकमले आज देखि ३ महिना छुट

काठमाडौ, कार्तिक २९ - नेपाल टेलिकमले कात्तिक २९ देखि ३ महिनाका लागि पीएसटिएन, सीडीएमए र जीएसएम मोबाइल सेवामा विभिन्न छुट ल्याएको छ । यस्तो छुट कम्पनीले आफ्नो नेटवर्कभित्र फोन गर्दा उपलब्ध गराउन लागेको हो ।

कम्पनीका अनुसार पीएसटीएन, सी फोन पोस्टपेड फिक्सडबाट उक्त अवधिमा शुक्रबार राति १० बजेदेखि आइतबार बिहान ८ बजेसम्म फोन गर्दा ४ मिनेटको १ रुपैयाँ शुल्क लाग्नेछ । यसअघि २ मिनेटको १ रुपैयाँ शुल्क लाग्थ्यो । यीसहित भिस्याटमार्फत हुने अन्तरदेशीय ट्रंक कलमा शुक्रबार राति १० देखि आइतबार बिहान ८ बजेसम्म प्रति ९० सेकेन्ड १ रुपैयाँ शुल्क लाग्ने व्यवस्था गरिएको छ । यसअघि ६० सेकेन्डको १ रुपैयाँ लाग्दै आएको थियो ।
जीएसएम र सीडीएमए पोस्टपेड मोबाइलबाट शनिबार बिहान ६ बजेदेखि राति १० बजेसम्म फोन गर्दा प्रतिमिनेट १ रुपैयाँबाट घटाएर ७५ पैसा शुल्क राखिएको छ । सीडीएमए र जीएसएम पि्रपेड मोबाइलबाट शनिबार बिहान ६ देखि राति १० बजेसम्म फोन गर्दा लाग्ने शुल्क १ रुपैयाँ ५० पैसाबाट घटाएर १ रुपैयाँ कायम गरिएको छ ।
दसैंदेखि छठसम्म सञ्चालित विभिन्न योजनामार्फत ग्राहकलाई ६ करोड ५९ लाख रुपैयाँभन्दा बढी बोनस वितरण गरेको जनाएको छ । कम्पनीले असोज २४ देखि कात्तिक २३ सम्म अन्तर्राष्ट्रिय सेवा प्रदायकमार्फत आगमन कल आउने ग्राहकलाई प्रतिमिनेट ५० पैसाका दरले बोनस दिने योजना ल्याएको थियो ।