अफगानिस्तान विश्वकप क्रिकेटका लागि छनोट

१८ असोज, काठमाडौं । अफगानिस्तान सन् २०१५ मा अष्ट्रेलिया र न्यूजिल्याण्डमा आयोजना हुने विश्वकप क्रिकेटमा छनोट भएको छ । शारजहाँमा भएको वर्ल्ड क्रिकेट लिग डिभिजन च्याम्पियनसिपको अन्तिम खेलमा केन्यालाई ७ विकेटले हराउँदै अफगानिस्तान पहिलो पटक ५० ओभरको विश्वकप क्रिकेटमा छनोट भएको हो । टेष्ट मान्यताप्राप्त १० टिम स्वत छनोट भएको विश्वकप क्रिकेटमा ४ वटा एशोसिएट-एफिलेटेट राष्ट्रको सहभागिता रहने छ । एशोसिएटबाट आयरल्याण्ड छनोट भइसकेको छ भने अफगानिस्तान छनोट हुने दोश्रो राष्ट्र बनेको छ । अरु २ टिम भने न्यूजिल्याण्डमा हुने छनौट प्रतियोगिताबाट छानिनेछन् । यो छनोट प्रतियोगितामा नेपालसहित, नेदरल्याण्ड, स्कटल्याण्ड, केन्या, नामिबिया, क्यानडा, पपुवा न्यूगिनी, युगान्डा, हङकङ र युएईले खेल्ने छन् । सन् २००१ मा क्रिकेटको सर्वोच्च संस्था आइसिसीमा आवद्ध भएको अफगानिस्तानले सन् २०१० र सन् २०१२ मा भएको ट्वान्टी-ट्वान्टी विश्वकप खेलेको थियो । उसले केही महिना अघि मात्र एशोसिएट राष्ट्रको मान्यता पाएको हो । शुक्रबार भएको खेलमा केन्याले प्रस्तुत गरेको ९४ रनको सामान्य लक्ष्य अफगानिस्तानले १ सय ७५ बल बाँकी छँदै ३ विकेट गुमाएर पुरा गर्यो । यसअघि पहिले व्याटिङ थोलेको केन्याले ४३.३ ओभरमा सबै विकेट गुमारु मात्र ९३ रन बनाएको थियो