सर्वोच्चको आदेश चिकित्सकले टेरेनन्

काठमाडौं, ६ माघ (ओएनएस) : सर्वोच्च अदालतले सोमबार अपरान्ह बन्द रहेको अस्पताल सुचारु गर्न आदेश दिएपनि आन्दोलनरत चिकित्सकले अस्पताल खोल्न मानेका छैनन् ।
अनसनरत डा. गोविन्द केसीको मागमा समर्थन जनाउँदै आन्दोलित भएका चिकित्सहरुले सर्वोच्चको लिखित जानकारी नआएकोले सेवा सुचारु नगर्ने जनाएका हुन् ।
सर्वोच्चले एक घण्टाभित्रै बन्द अस्पताल सुचारु गर्न आदेश दिएको थियो । तर त्यसको दुई घण्टापछि नेपाल चिकित्सक संघले सेवा सुचारु गर्न सर्वोच्चले दिएको आदेशबारे लिखित जानकारी नआएको भन्दै आन्दोलन जारी रहेको जनाएको छ ।
एक विज्ञप्ति जारी गर्दै चिकित्सक संघले देशभरका सम्पूर्ण स्वास्थ्य संस्थामा अत्यावश्यक बाहेक अन्य सेवाहरु बन्द कार्यक्रमलाई निरन्तता दिने बताएको हो ।
चिकित्सक संघका अध्यक्ष अन्जनीकुमार झाले भने लिखित जानकारी नआएको र माग पुरा नभएकोले आन्दोलन जारी रहेको बताए ।
सर्वोच्च अदालतले अस्पताल अत्यावश्यकीय सेवा भएको भन्दै आदेश प्राप्त भएको एक घण्टाभित्र सेवा सुचारु गर्न आदेश दिएको थियो ।

सर्वोच्चको आदेश चिकित्सकले टेरेनन्