प्रचण्डको कार्यक्रमलाई लक्षित गर्दै सप्तरी बन्द

सप्तरी, २१ कात्तिक । एकीकृत नेकपा माओवादीका अध्यक्ष पुष्पकमल दाहाल प्रचण्ड तथा नेताहरू बाबुराम भट्टराई र नारायणकाजी श्रेष्ठ चुनावी सभालाई सम्बोधन गर्न आउने भएपछि नेकपा–माओवादीले बिहीबार सप्तरी जिल्ला बन्द गरेको छ । चुनावी सभालाई बिथोल्ने प्रयासस्वरुप नेकपा–माओवादीका जिल्ला इन्चार्ज देवनाथ यादवले एक विज्ञप्ति जारी गरी जिल्ला बन्दको आह्वान गरेका हुन् । बन्दका कारण आज बिहानैदेखि भाडामा चल्ने ठूला तथा साना सवारीसाधन ठप्प हुँदा सर्वसाधारण मर्कामा परेका छन् ।

अध्यक्ष दाहालसहितका एमाओवादी नेताहरू सो पार्टीले भारदह, कञ्चनपुर, राजविराज, कल्याणपुरमा सञ्चालन गर्ने चुनावीसभालाई सम्बोधन गर्न झापा, मोरङ, सुनसरी जिल्ला हुँदै आज सप्तरी आउनुहुने कार्यक्रम रहेको छ । एमाओवादीले संविधानसभा चुनावलाई लक्षित गर्दै मेचीको काँकडभिट्टादेखि महाकालीको महेन्द्रनगरसम्मको ‘मेची महाकाली राष्ट्रिय जागरण अभियान’ बुधबारदेखि सुरु गरेको हो ।

यसैबीच, मोटरसाइकलका कारण आपराधिक घटना हुन सक्ने भन्दै सप्तरी जिल्ला प्रशासनले आजबाट जिल्लामा भारतीय मोटर साइकल सञ्चालनमा निषेध गरेको छ । आसन्न संविधानसभाको निर्वाचनमा आपराधिक व्यक्तिहरूको सम्भावित प्रवेशलाई ध्यानमा राखी आगामी मङ्सिर ४ गतेसम्मका लागि भारतीय नम्बरका मोटरसाइकल चलाउन निषेध गरिएको हो ।

भारतीय नम्बरका मोटरसाइकल निषेध गर्ने, विभिन्न ठाउँमा ट्राफिक सुरक्षा जाँच बढाउने, अवैध मदिरा उत्पादन, बिक्री–वितरण नियन्त्रण गर्र्ने प्रमुख जिल्ला अधिकारी हरिकृष्ण पौडेलले बताउनुभयो । जिल्ला प्रहरी कार्यालय र विभिन्न इलाका प्रहरी कार्यालयबाट बरामद गरिएको ५ सय लिटर अवैध मदिरा हिजो जिल्ला प्रहरी कार्यालयमा नष्ट गरिएको उहाँले जानकारी दिनुभयो