सर्वोच्चको आदेश नमान्ने वैद्यको खुलेआम घोषणा (भिडियो सहित)

२९ कात्तिक, काठमाडौं । मोहन वैद्य नेतृत्वको नेकपा-माओवादीले सर्वोच्च अदालतलाई चार दलको अदालत भन्दै उसको आदेश नमान्ने बताएको छ ।

शुक्रबार पार्टी कार्यालयमा पत्रकार सम्मेलन गरी माओवादी अध्यक्ष बैद्यले अदालतलाई नमान्ने बताउनुभयो । यसअघि बन्द फिर्ता लिन सर्वोच्च अदालतले दिएको अन्तरिम आदेशको पत्र बुझाउन आएका कर्मचारीलाई माओवादी प्रवक्ता पम्फा भुसालले कार्यालय समय सकिएको भन्दै फिर्ता पठाउनुभएको थियो । सर्वोच्च अदालतले संविधानसभा निर्वाचनमा मतदान गर्न पाउने जनताको अधिकारलाई कुन्ठित गर्ने अधिकार कसैसँग नभएको भन्दै बन्द हड्ताल फिर्ता लिन बिहीबार अन्तरिम आदेश दिएको थियो । बन्द फिर्ता लिन सर्वोच्च अदालतले दिएको आदेशले बहिस्कार गर्न पाउने जनताको अधिकार कुन्ठित भएको भन्दै बैद्यले त्यसलाई नमान्ने बताउनुभयो । ‘यो चारदलीय अदालत हो । यो अदालतलाई मान्ने कुरै आउँदैन’ अदालतप्रति आक्रामक रुपमा प्रस्तुत भएका बैद्यले भन्नुभयो-’अदालत आफ्नो ढंगले जाओस्, हामी हाम्रो ढंगले जान्छौं ।’ कार्यपालिका र न्यायपालिकामा एउटै व्यक्ति भएपछि अदालत स्वतन्त्र र निस्पक्ष नभएको भन्दै माओवादी अध्यक्ष बैद्यले यदि अदालत साँच्चै स्वतन्त्र थियो भने राष्ट्रिय सहमतिका लागि किन आदेश दिएन भनी प्रश्न गर्नुभयो । हिंसात्मक घटनाको जवाफदेही छैनौं आफूहरुको बहिस्कार आन्दोलन शान्तिपूर्ण रहेको भन्दै बैद्यले आन्दोलनका क्रममा भएका हिंसात्मक घटनाको जिम्मा लिन अस्वीकार गर्नुभयो । ‘जनता आक्रोशित छन्, कार्यकर्ता आक्रोसित छन्, यो सबै त्यसको अभिव्यक्ति हो’ बैद्यले भन्नुभयो-’यो जिम्मा सरकार र चार दलका शीर्ष नेताहरुले लिनुपर्छ । यसको जवाफदेही हामी छैनौं ।’ यद्यपि उहाँले लडाईबाट आएको पार्टीलाई बाहिर राखेर चुनाव गर्न खोजेको अहिलेको अवस्थामा केही घटनाहरु हुनुलाई स्वाभाविक रुपमा लिनुपर्ने बताउनुभयो । पक्राउ परेका आफ्ना कार्यकर्तालाई संगठित अपराधको मुद्दा लगाएर विरोधीहरुलाई समाप्त पार्ने षड्यन्त्र गरिएको भन्दै बैद्यले भन्नुभयो- ‘सहमतिको राजनीति र संविधानसलाई ध्वस्त पार्नेहरुलाई के भन्ने ? लोकतन्त्र र संविधानविरुद्ध गएको मुद्दा लाग्छ ।’ उहाँले आन्दोलनका क्रममा १ सय ५० भन्दा बढी आफ्ना नेता कार्यकर्ता पक्राउ परेको भन्दै रिहा गर्न सरकारसँग माग गर्नुभयो । आफूहरुको बहिस्कार आन्दोलनमा जनताको पूर्ण समर्थन भएको दाबी गर्दै माओवादी अध्यक्ष बैद्यले सरकारले सेना परिचालन गरेर जवरजस्र्ती सवारी साधन चलाउन लगाएको दावी गर्नुभयो । सरकारले भने हड्तालका क्रममा भएका हिंसात्मक घटनामा पक्राउ परेका अधिकांश नेकपा-माओवादीका कार्यकर्ता भएको बताएको छ । ‘प्रचण्डमाथिको आक्रमण जनताले गरेको’ बम हानेर आफ्नो हत्या गर्न खोजेको प्रचण्डको आरोपबारे सोधिएको प्रश्नमा बैद्यले ‘जनताले गरेको’ भन्दै पन्छिनु भयो । विल्कुल होइन, हामीले किन मार्ने प्रचण्डलाई । उहाँ मानसिक रुपले पराजित हुनुभएको छ’ बैद्यले भन्नुभयो- ‘उहाँ सहयोगीलाई पाखा लगाउने खलनायक हुनुहुन्छ । उहाँले धेरै अपराध गरेकाले जनताले गरेको हो । जनता उहाँविरुद्ध छन् भन्ने प्रमाण हो ।’ चुनाव हुन्छ कि रोक्न सक्नुहुन्छ भन्ने प्रश्नमा बैद्यले यसै भन्न नसक्ने बताउनुभयो । ‘चुनाव हुन पनि सक्छ, नहुन पनि सक्छ, अझै अनिश्चित छ’ उहाँले भन्नुभयो- ‘भइहाल्यो भने पनि जनताको संविधान बन्दैन ।’ राष्ट्रिय सहमतिको विकल्प नभएको भन्दै माओवादी अध्यक्षले सहमतिका लागि सरकार र दलहरुलाई दबाव दिन नागरिक समाज, बुद्धिजिवी सबैसँग आग्रहसमेत गर्नुभयो

भिडियो हेर्नुहोस