अमिताभ बच्चनले खाएका ५ ठकर

११ अक्टोबर शुक्रबार बलिउडका महानायक अमिताभ बच्चन ७१ वर्ष पुगेका छन् । बलिउड इतिहासकै युगपुरुषको छवि बनाएका अमिताभले आफ्नो यो ७१ वर्षे उमेरको धेरै हिस्सा बलिउडकै लागि खर्चिए । बलिउडमा कुनै समय एकछत्र राज चलाएका अमिताभको क्रेज अझै घटेको छैन बलिउडमा । यद्यपि उमेर पाको बन्दै जाँदा उनले पहिलेजस्तो काम गर्न सक्दैनन् शारीरिक रुपमा पनि । तर जे होस् बलिउडको यो लामो यात्रामा अमिताभले दाम, नाम, इज्जत, आशिर्वाद, सम्मान सबै कमाए । इलाहावादमा जन्मिएका अमित श्रीवास्तव भविष्यमा बलिउडका महानायक बन्लान् भनेर सुरुमा कसैले अनुमान लगाएको थिएन होला । तर उनी भइछाडे । यद्यपि उनी तालुमा आलु फलेर यत्रो सफलताका भागिदार भएका होइनन् । उनले आफ्नो जिवनमा धेरै संघर्ष गर्नुपरेको थियो । अमिताभ बच्चनले साता हिन्दुस्तानी फिल्मबाट आफ्नो बलिउड करिअर सुरु गरेका थिए । तर उक्त फिल्म उनको करिअरको सुपर फ्लप फिल्म थियो । त्यसपछिका पनि धेरै फिल्म फ्लप भएपछि फिल्म निर्माताहरुले अमिताभलाई खेलाउन पनि हिच्किचाउन थालेका थिए । उनले कुनै समय फिल्म पाउनै छाडेका थिए । उनकै कुनै दिन मुम्बइबाट झोला तुम्मा कसेर घर फर्किने सोँच समेत बनाएका थिए । तर जब जन्जीर फिल्म हिट भयो तब अमिताभका दिन फर्के, उनी एकाएक हिट भए । जन्जीर पछि दिवार, नमक हराम, शोले, काला पत्थर, त्रिशुल, डन जस्ता सुपरहिट फिल्म अमिताभले खेले । तर पनि अमिताभलाई दुर्भाग्यले छाडेन । १९८३ मा फिल्म कुल्लीको शुटिङका दौरान उनी गम्भीर दुर्घटनामा परे । फिल्म शुटिङका बेला एक दृश्यमा पुनित इस्सरले हानेको मुक्का उनको पेटमा नराम्रोसँग बजारिएपछि उनलाई तत्काल अस्पताल पूराउनु परेको थियो । त्यहाँ उनको सघन उपचार गर्नुपरेको थियो । १९९५ मा अमिताभले एक विजनेश सुरु गरे । अमिताभ बच्चन कर्पोरेसन लिमिटेड थियो त्यो कम्पनीको नाम जसले फिल्म निर्माण तथा इभेन्ट म्यानेजमेन्ट गथ्र्यो । तर महत्वाकांक्षी अमिताभले मिस इण्डिया प्रतियोगिता पनि गर्ने घोषणा गरे । जुन असफल भएसँगै कम्पनीलाई सफल पार्ने उनको योजना त्यहीँ तुहियो । हुनत कम्पनीले १५ फिल्म लञ्च गर्यो जसको बजेट ३ देखि ५ करोडसम्म थियो । केही फिल्मको वितरण पनि गर्यो । यसमा डेढ सय कर्मचारी थिए । पहिलो वर्ष राम्रै नाफा गरेको कम्पनी अर्को वर्षदेखि ठूलो घाटामा गयो र आखिर बन्द गर्नुपर्यो । कम्पनी घाटामा गएर ऋण लागेपछि अमिताभको मुम्बइ तथा दिल्लीको घरजग्गा नै जफत हुने स्थिति आयो । उनले आफ्नो घर जमानत राखेर ऋण लिए । निकै आर्थिक संकटबाट गुजि्ररहेका बेला अमिताभले फिल्म निर्माता यश चोपडासँग सहयोग मागे । यसले आफ्ना छोराले बनाउन लागेको फिल्म मोहब्बतेमा अभिनयका लागि अमिताभलाई छोरासँग भेट्न पठाए । उक्त फिल्ममा काम पक्का भएसँगै अमिताभलाई कौन बनेगा करोडपति शो को संचालनका लागि समेत अफर आयो । यसबाट उनले आफ्नो ९० करोडको ऋण चुक्ता गर्न सफल भए र नयाँ जिवनको सुरुवात गर्न सफल भए । सन् १९८४ मा अमिताभ बच्चनले फिल्मबाट विश्राम लिएर राजनीतिमा लाग्ने कोसिस गरे । उनको यो प्रयासमा राजिव गान्धी सहयोगी बने । उनलाई कंग्रेसले इलाहावाद लोकसभाबाट उमेद्धार बनायो । अमिताभले त्यो चुनाव भारी अन्तरले जिते । तर चुनाव जितेर सांसद बनेको ३ वर्षमै उनले राजिनामा दिए । उनी त्यस समयमा बोफोर्स काण्डमा मुछिएका थिए । त्यो काण्डमा गान्धी परिवार सँगै बच्चन परिवारलाई पनि मुछिएको थियो । अमिताभलाई सस्तो मूल्यमा किसानबाट जमिन खरीद गरेको आरोप लगाइएको थियो । तर पछि उनले यस्तो आरोपबाट सफाइ पाए । अमिताभ बच्चनले राजनीति छाडेसँगै कंग्रेस पार्टीप्रतिको आस्था पनि छाडे र समाजवादी पार्टीको समर्थक बने । उनकी पत्नी जया त समाजवादी पार्टीकी संासद पनि बनिन् । -