यस्ता छन १३ निर्बाचन क्षेत्रका बाहुन उम्मेदवार

१९ असोज, काठमाडौं । आफूले जित्ने निर्वाचन क्षेत्र छान्ने चलन तिव्र हुँदै गएको छ । गृहक्षेत्र वा कर्मक्षत्रेमा उठ्दा चुनाव हारिने कारणले असम्बन्धित चुनाव क्षेत्र रोज्ने चलनलाई लोकतन्त्रमा स्वाभाविक मान्ने कि अस्वस्थ अभ्यास मान्ने ? यसबारे बहस शुरु हुनुअगावै मतदाताहरुमा ‘बाहिरिया’ र ‘स्थानीय’ वीच

 अन्तरविरोध शुरु भैसकेको छ । पहिलो संविधानसभा चुनावमा काठमाडौं १० मा एमाओवादी अध्यक्ष प्रचण्डसँग एमालेका सानुकुमार श्रेष्ठले प्रतिश्पर्धा गर्नुभएको थियो । त्यसबेला केही स्थानीयले नेवाः प्रदेशमा ‘बाहुन’ उठाइएको चर्चा गरेपछि कीर्तिपुरको एउटा सभामा प्रचण्डले आक्रोश पोख्दै आफ्नो देशको नागरिक जुनसुकै क्षेत्रमा पनि चुनाव लड्न सक्ने हुँदा नेवार र बाहुन भनी गरिएको विभेदलाई घटिया अभिव्यक्तिको संज्ञा दिनुभएको थियो । तर, ठूला नेताले जित्ने क्षेत्र छानीछानी चुनावमा भाग लिनुलाई नेताहरुले सकारात्मक र स्वाभाविक भने पनि यसबारे फिल्डमा अन्तरविरोध जबर्जस्त उठ्ने/उठाइने गरेको छ । त्यसैले यसबारे नेताहरुले मतदातासँग पर्याप्त बहस गरेनन् भने आगामी चुनावमा यो मुद्दा गतिलै गरी विपक्षीको मसला बन्न सक्ने देखिन्छ । को-को छन् पाहुना उम्मे्वार ? आगामी मंसिर ४ मा हुन लागेको संविधासभा चुनावमा जित्ने ठाउँको खोजी गर्दै हिँड्ने पर्यटकजस्ता पाहुना उम्मेद्वारको लर्को निकै लामो छ । ठूला दलका ठूला नेतादेखि साना दलका नेताहरु समेत योपटकको चुनावमा पाहुना उम्मेद्वार बनेका छन् । संविधानसभाको प्रत्यक्षतर्फ सुदुरपूर्वका नेता मध्यमाञ्चलका जिल्लामा, मध्यपश्चिमका नेता सुदुरपूर्वका जिल्लामा समेत पुगेर पाहुन उम्मेद्वार बनेको अवस्था छ । अघिल्लो संविधानसभाको चुनावमा दुई-दुई क्षेत्रबाट उठेका ठूला दलका ठूलै नेताहरु दुवै क्षेत्रबाट पछारिएपछि योपटक दुईवटा क्षेत्रबाट उम्मेद्वारी दिने नेताहरुको संख्या पनि बढेको । एउटा क्षेत्रबाट हारे पनि अर्को क्षेत्रबाट जितिने मनोविज्ञानले धेरै नेताहरु पाहुना उम्मेद्वार बन्न पुगेका हुन् । यो पटक ठूला पार्टीका अध्यक्षदेखि वरिष्ठ नेताले समेत दुईवटा क्षेत्रबाट उम्मेद्वारी दिएका छन् । एकीकृत माओवादीका अध्यक्ष पुष्पकमल दाहाल प्रचण्डले योपटक पनि २ वटा क्षेत्रबाट उम्मेद्वारी दिनुभएको छ । ०६४ सालको चुनावमा काठमाडौ १० र रोल्पा २ बाट जित्नुभएका प्रचण्ड यो पटक पूर्वी मधेशको सिरहा ५ मा पाहुना लाग्न पुग्नुभएको छ । सिरहा ५ मा अध्यक्ष प्रचण्डले कांग्रेसका स्थानीय चन्द्रनारायण यादब र एमालेका लीलानाथ श्रेष्ठसँग प्रतिस्पर्धा गर्दैहुनुहुन्छ । ०६४ सालको संविधानसभाको चुनावमा गृहजिल्ला बाँकेबाट पराजित हुनुभएका कांग्रेस सभापति सुशील कोइराला पनि अहिले गृहजिल्ालका साथै चितवनमा पाहुना लाग्न पुग्नुभएको छ । सभापति कोइराला यो पटक पाहुना बनेर बाँके ३ का साथै चितवन-४ मा पुग्नुभएको हो । त्यसैगरी ०६४ सालको संविधानसभा निर्वाचनमा इलाम १ बाटमात्रै उम्मेद्वारी दिनुभएका एमाले अध्यक्ष झलनाथ खनाल यो पटक सर्लाही १ मा पाहुना लाग्नुभएको छ । वहाँले सर्लाही १ मा कांग्रेसकी सुशीला कार्की र एमाओवादीका शम्भु श्रेष्ठसँग प्रतिस्पर्धा गर्नुहुने भएको छ ।