बसको टिकट भन्दा पनि सस्तो सभासदको

भट्टराईले काठमाडौं फोन गरेर आफन्तलाई सोध्नुभयोे- ‘दशैंको टीकाका दिन काठमाडौंबाट घर जाने बसको टिकट पाइएला ?’ तत्कालै जवाफ फर्कियो,-’दशैंमा बसको टिकट पाउन असम्भव छ ।’ सर्वसाधारणका लागि काठमाडौंबाट घर र्फकने बसको टिकट पाउन साँच्चै नै गाह्रो छ । तर, संविधानसभाको टिकट चाहनेहरुका लागि भने यतिबेला दशैं आएजस्तै भएको छ । संविधानसभाको टिकट सस्तो नभएको भए पाँचजना कांग्रेस नेताले एमाओवादी बनेर प्रत्यक्ष चुनाव लड्न पाउने थिएनन् । रोचक के छ भने तराईका विभिन्न पाँचवटा क्षेत्रमा नेपाली कांग्रेेसका पाँच नेता एमाओवादीका तर्फबाट चुनाव लड्दैछन् । त्यसो त वैद्य माओवादीको अखिल क्रान्तिकारीका महासचिव कमल शाहीले पनि एमाओवादीमा प्रवेश गरेकै दिन शुक्रबार समानुपातिकतर्फको टिकट पाउनुभएको छ । नेपाली कांग्रेसका जिल्ला सचिव बाबुराजा ओझालाई मोरंग ६ बाट एमाओवादी कार्यकर्ताले मतदान गर्नुपर्ने भएको छ । प्रचण्डनिवासबाट दलबलसहित एमाओवादीमा प्रवेश गरेपछि ओझाले त्यसको दुई रात नबित्दै टिकट पाउनुभएको हो । कांग्रेस नेता ओझा मोरंग ६ मा कांग्रेसकै महेश आचार्यसँग प्रतिश्पर्धा गर्दै हुनुहुन्छ । मोरंग ६ मा अघिल्लो चुनावमा एमाओवादी ३३ सय मत ल्याएर तेस्रो स्थानमा थियो । विगतमा फोरमले जितेको यो क्षेत्रमा ०६४ सालमा कांग्रेस दोस्रो -११ हजार मत) र एमाले तेस्रो -७ हजार) स्थानमा थिए । आफ्नो स्थान कमजोर भएकाले कांग्रेसका बागीलाई हँसिया हथौडा थमाएर एमाओवादीले महेश आचार्यलाई हराउने रणनीति अपनाउँदा एमालेले फाइदा लिने सम्भावना बढेको बताइन्छ । महोत्तरी २ मा पनि एमाओवादीले कांग्रेसलाई प्रत्यक्षतर्फको टिकट दिएको छ । कांग्रेसबाट राष्ट्रपतिकी भतिजी किरण यादव उठेको यो क्षेत्रमा ०६४ सालमा एमाओवादी ४ हजार मत ल्याएर छैठौं स्थानमा सीमित भएको थियो । आफूले नजित्ने भएकाले एमाओवादीले कांग्रेसलाई अप्ठ्यारो पार्न कांग्रेसकै महासमिति सदस्य लालबाबु यादवलाई टिकट दिएको छ । त्यसैगरी महोत्तरी ५ मा एमाओवादीले कांग्रेसका रसिद हैदरलाई टिकट दिएको छ । यो क्षेत्रमा पनि ०६४ को चुनावमा एमाओवादीको ४४ सय मतमात्रै आएको थियो । उक्त चुनावमा एमाओवादीले चौथो स्थान ल्याएको थियो । कांग्रेसका हैदरलाई टिकट दिने क्रममा वाइसिएलका जिल्ला अध्यक्षलाई ‘ब्याक’ गराइएको छ । एमाओवादीले सर्लाही १ मा एमाले अध्यक्ष झलनाथ खनाललाई हराउने रणनीति अपनाउँदै कांग्रेसका शम्भु श्रेष्ठलाई टिकट दिएको छ । अघिल्लो चुनावमा एमालेका प्रकाश पाखि्रनले जितेको यो क्षेत्रमा कांग्रेस चौथो स्थानमा थियो । तर, कांग्रेसकी सुशीला कोइरालासँग रुष्ट बनेर एमाओवादीमा प्रवेश गरेका कांग्रेस नेता श्रेष्ठलाई टिकट दिएर एमाओवादीले झलनाथ हराउने रणनीति बनाएको बताइन्छ । उता महोत्तरी ४ मा रामकमार शर्माकी श्रीमती इन्दू शर्माविरुद्ध एमाओवादीका केन्द्रीय सल्लाहकार राजेन्द्र साहको बागी उमेद्वारी परेको छ । विगतमा धनुषा क्षेत्र नं ५ मा ४५ सय मत ल्याएर चौथो स्थानमा रहेको एमाओवादीले राष्ट्रपति रामवरण यादवका भतिजा विजय यादवलाई टिकट दिएको छ । राष्ट्रपतिपुत्र डा. चन्द्रमोहन यादव उठेको यस क्षेत्रमा एमाओवादीले गत वर्षमात्रै आफ्नो पार्टीमा आएका विजयलाई टिकट दिएर कांग्रेसलाई फुटाउने रणनीति लिएको बताइन्छ