युद्धकालिन हतियार बरामद

जाजरकोट , कार्तिक २७ - जाजरकोट प्रहरीले सदरमुकाम खलंगा- ८, पिपेमाथिको रानीवनबाट युद्धकालिन हतियार बरामद गरेको छ । प्रहरीले विशेष सुराकीको आधारमा उक्त जंगलमा पोलिथिनको बोरामा लुकाई राखेको ६ नाल थ्री नट थ्री राइफल बरामद गरेको हो ।

प्रहरीले थ्री नट थ्री राइफलसहित इन्सास हतियारका २ सय ५० राउण्ड गोली समेत बरामद गरेको प्रमुख जिल्ला अधिकारी चक्रपाणि पाण्डेले बताए । जाजरकोट प्रहरी प्रमुख एवं प्रहरी नायव उपरीक्षक चक्रबहादुर सिंहको नेतृत्वमा गएको गस्तीले उक्त हतियार बरामद गरेको प्रजिअ पाण्डेले बताए ।
हतियार कसले लुकाएको भन्नेबारे खुल्न नसकेको पाण्डेले बताए । त्यस क्षेत्रमा अन्य हतियार पनि लुकाएर राखेको हुन सक्ने प्रहरीको अनुमान छ ।
दुई महिना अघि प्रहरीले त्यस क्षेत्रमा ४४ थान थ्री नट थ्री राइफल र टुइन्च मोर्टार १ थान बरामद गरेको थियो । निर्वाचनको मुखैमा सदरमुकाम देखि ८ किलोमिटरको दुरीमा युद्धकालिन हतियार फेला परेकोले स्थानीय थप शसंकित भएका छन् ।
यो क्षेत्र नेकपा-माओवादीको पकट मानिन्छ ।

युद्धकालिन हतियार बरामद