झलनाथ खनाल: चुनावपछि थाहा हुन्छ बाघ र स्याल

काठमाडौ, कार्तिक १९ - एमाले अध्यक्ष झलनाथ खनालले मंसिर ४ को लागि तय भएको संविधानसभाको निर्वाचन रोक्छु भन्नु दिवा सपना भएको दावी गरेका छन् ।

रिपोर्टर्स क्लबद्वारा साक्षात्कारमा बोल्दै उनले नेपाली जनता मतदानको लागि तम्तयार भएर बसिसकेकोले अब कसैले निर्वाचन रोक्न नसक्ने तर्क गरे ।
खनालले नेकपा-माओवादीलाई आमहडताल रोकेर जनताको मतको सम्मान गर्न आग्रह गर्दै त्यसो नगरी कानुन हातमा लिएर भाँड्न लागे सरकार कारवाही गर्न तयार हुनु पर्ने सुझाव दिए ।
केही छिटपुट घटना गरे पनि सरकारको अन्तरिम सुरक्षा तयारी राम्रो भएको भन्दै सरकार निष्पक्ष, भयरहित र स्वतन्त्र पूर्ण निर्वाचन गर्न सक्षम रहेको खनालले दाबी गरे ।
एमाओवादी अध्यक्ष प्रचण्डले काग्रेस र एमाले नरहेको भनि दिएको अभिब्यक्ति प्रति लक्षित गर्दै उनले भने,'प्रचण्डजी धैर्य गर्नुस्, मंसिर ४ पछि को बाघ हुन्छ र को स्याल हुन्छ ?'
प्रचण्डले नेकपा-माओवादीलाई मन्त्री परिषदबाट मनोनित हुने २६ सिट दिएर संविधानसभामा सहभागी गराउने भनी राखेको प्रस्तावमा माओवादीजस्तो ठूलो शक्तिलाई त्यस्तो प्रस्ताव राख्नु अपमान भएको भन्दै यस्तो कुरा गर्नु राम्रो नहुने चेतावनी दिए ।