इन्डियामा भागदौड हुँदा ८९ मृत्यु (फोटो सहित)

रत, २७ असोज । भारतको मध्यप्रदेशको दतिया जिल्लाको रत्नगढ मन्दिरअगाडि एक पुलमा आइतबार भएको भागदौडमा कम्तीमा ८९ व्यक्तिको मृत्यु भएको जानकारी प्रहरीले दिएको छ भने दर्जनौँ व्यक्ति पुल तल खस्न पुग्दा मर्नेको संख्या बढ्नसक्ने अनुमान गरिएको छ । स्थानीय प्रहरी उपमहानिरीक्षक डी.के. आर्यले ८९ व्यक्ति मरेको पुष्टि भएको र मर्नेको संख्या १ सय पुग्नसक्ने अनुमान गरिएको बताए । आर्यले थप १ सय व्यक्ति घाइते भएको बताए । बिहानको खाना खाने समयमा एउटा ट्र्याक्टर पुलमा ठोकिएपछि उक्त पुल भत्कनसक्ने हल्लामा भागदौड चलेको आर्यले बताए ।

उनले निकै व्यक्ति नदीमा खसेको र उनीहरूको अवस्था थाहा हुननसकेको बताए । प्रहरीका अन्य स्रोतले सिन्ध नदीमाथि रहेको उक्त पुलमा भागदौडको समयमा करिब २० हजार व्यक्ति रहेको अनुमान गरिएको जानकारी दिएका छन् । उक्त पुलको दायाँबाँया बिहान सबेरैदेखि ठूलो भीड लागेको प्रत्यक्षदर्शीले बताए । भोपालबाट करिब ३ सय ५० किलोमिटर उत्तरमा रहेको दतिया जिल्लाको उक्त मन्दिरमा दुर्घटनाको समयमा करिब चार लाख भक्तजन जम्मा भइसकेको बताइएको छ ।

प्रहरीले भीडमा लाठी प्रहार गर्दा परिस्थिति अझै बिग्रिएको भारतीय टेलिभिजन सञ्जाल एनडीटीभीले घटनास्थलमा रहेका स्रोतलाई उद्धरण गरी उल्लेख गरेको छ । आर्यले भने प्रहरीले लाठी प्रहार नगरेको बताए । टाइम्स अफ इन्डियाले उद्धार कार्यबाट दिक्क भएका भीडले प्रहरीमाथि ढुङ्गा हानेको देखिएको समाचार दिएको छ ।

उक्त क्षेत्रमा ठूलो सङ्ख्यामा सवारीका साधनको घुँइचोका कारण घाइतेलाई अस्पताल लैजाने कार्यमा समस्या देखिएको थियो । यसबीच पनि करिब २० चिकित्सक घटनास्थलमा पुग्न सफल भएको र नजिकैको अस्पताल घाइतेको उपचारका तयार बनाइएको उक्त समाचारपत्रले आफ्नो वेबसाइटमा उल्लेख गरेको छ ।

आज भारतमा हिन्दूहरू नवरात्री चाड मनाउँदै छन् र यस दिन हिन्दू देवी दुर्गाको पुजा गरिन्छ । सत्ताधारी कंग्रेस पार्टीका नेत्री सोनिया गान्धीले उक्त घटनाबाट पीडितप्रति समवेदना प्रकट गर्नुभएको छ । राष्ट्रिय विपत्ति व्यवस्थापन प्राधीकरणका प्रवक्ता तृप्ती पारुलले आफूहरूले फाइलिनले व्यापक क्षति पु-याउने अनुमान गरेको तर त्यसो नभएको बताइन् ।