महँगीले ढाड सेक्यो

धनगढी, २२ असोज । वडा दसैंको चहलपहल बढ्दै गएका बेला मालसामानको मूल्य बढेपछि सर्वसाधारणहरु मारमा परेका छन् । कैलालीको धनगढी, अत्तरिया, टीकापुर, लम्कीलगायतका बजार क्षेत्रमा दसैँका लागि मालसामान किनमेल गर्नेहरुको घुइँचो बढेसँगै कतिपय सामानको मूल्य पनि चर्को भएको स्थानीय उपभोक्ताले गुनासो गरेका छन् ।

बर्सेनि बढ्दै गएको महँगीले गरिबका लागि दसैँ दसाका रुपमा देखिन थालेको स्थानीय मीनबहादुर साउदले भन्नुभयो । "घरमा एक जनाको कमाईले नपुग्ने भयो, दसैँ नआएको भए हुन्थ्यो जस्तो लाग्छ ।" स्थानीय बजारमा दसैँका लागि कपडा किनमेल गरिरहनुभएका साउदले दुखेसो सुनाउनुभयो— ‘‘गत वर्ष ७ सयमा पाउने पाइन्ट यसपालि एक हजार १ सय पुगेको रहेछ ।’’

हुनेखाने वर्गका लागि दसैँमा रमाइलो भए पनि गरिब एवम् विपन्न वर्गका लागि दसैँ कागलाई बेल पाक्यो हर्ष न विस्मातसरह बनेको अर्का उपभोक्ता मनु नेपालीले बताउनुभयो । दसैँका बेला घरमा आवश्यक पर्ने खर्चपातको जोहो गर्न नसक्दा नयाँ लुगा लगाउन र मीठो खान नपाइने अवस्था आएको विपन्न समुदायका व्यक्तिहरुको गुनासो रहेको छ ।
"मजदुरी गरेर भएको आम्दानीले महँगीका कारण दसैँका लागि घर खर्च धान्न धौधौ भइसक्यो ।’’ मजदुरी गरेर जीवनयापन गरिरहेका मजदुर कालुराम चौधरीले भन्नुभयो । महँगी बर्सेनि बढ्दै गए पनि यसलाई नियन्त्रण गर्नेतर्फ सरकारले ध्यान नदिएको यी उपभोक्ताको गुनासो छ ।

नोकरीका लागि विदेशिएकाहरु दसैँ मनाउन घरका लागि लत्ताकपडा, गुन्टा लिएर फर्किने क्रममा सीमामा लुटिने र दुव्र्यवहार खेप्नुपर्ने अर्को समस्या झेल्न बाध्य रहँदै आएका छन् ।

नेपाल–भारत सीमा समन्वय बैठकमा दुवै देशका समकक्षी अधिकारीहरुले सीमामा ज्यादती रोक्ने सहमति गर्ने गरेको भए पनि त्यस्तो सहमति कागज र कुरामा मात्रै सीमित हुने गरेको पीडितहरु बताउँछन् ।